Inic Mācuīlli Tōnatiuh

Nemachiyōtīlli:Tepiton tlacuilolli Inic Mācuīlli Tōnatiuh Huehcāuhānānuac tlahtōllōtl ca.

Tlahtōllotl

In nicān cah zāzānīlli ye huehcauh mochīuh in ic mamanca tlālli, cēcentetl in ītlamamanca in ic pēuh in zan iuh macho in īquin tzīntic in achtopa in omanca Tōnatiuh ixquichca chicōntzonxihuitl īpan chicuēpōhualxihuitl īpan ōnxihuitl āxcān īpan cē ilhuitl ītech Ātlcāhualo īpan chicōme tōchtli xihuitl. Inin Tōnatiuh nāhui ocelotl ītōcā; Tezcatlīpoca catca īteōuh. Inihqueh in iz cēpan onoccah ocelocuālohqueh īpan nāhui ocelotl in Tōnatiuh catca. Auh in ic tēcuāncuālohqueh mahtlācxihuitl īpan yēxihuitl, in ic tlamito auh ihcuāc poliuh in Tōnatiuh. Auh in quicuāyah ācēcentli in intonacayouh catca. Auh in ic nencah centzonxihuitl īpan mahtlācpōhualxihuitl īpan yēpōhualxihuitl īpan caxtollioncēxihutli. In ic popoliuhqueh zan cemilhuitl in cuālohqueh nāhui ocelotl īpan cemilhuitōnalli in ic poliuhqueh. Auh in inxiuh catca cē ācatl.

Inin Tōnatiuh nāhui ehēcatl ītōcā; Quetzalcōātl catca īteōuh. Inihqueh in inic ōppa onoccah ehēcatoqueh īpan nāhui ehecatl in Tōnatiuh catca. Auh in ic poliuhqueh ehēcatoqueh, ozomahtin mocuepqueh; in incal in incuauh moch ehēcatoc, auh inin Tōnatiuh zan nō ehēcatoc. Auh in quicuāyah cencocopi in intonacayouh catca. Auh in ic nencah caxtolpōhualxihuitl īpan yēpōhualxihuitl īpan nāhui xihuitl. In ic popoliuhqueh zan cemilhuitl in ehēcatoqueh nāhui ehēcatl īpan cemilhuitōnalli in ic poliuhqueh. Auh in inxiuh catca cē tecpatl.

Inin Tōnatiuh nāhui quiyahuitl ītōcā; Tlāloc catca īteōuh. Inihqueh in inic yēppa onoccah tlequiyahuilōqueh īpan nāhui quiyahuitl in Tōnatiuh catca. Auh in ic poliuhqueh in tlequiyauh, totolin mocuepqueh. Auh in quicuāyah āhuatomatl in intonacayouh catca. Auh in ic nencah caxtolpōhualxihuitl īpan mahtlāctliomōnxihuitl.In ic popoliuhqueh zan cemilhutl in tlequiyahuilōqueh, nāhui quiyahuitl īpan cemilhuitōnalli in ic poliuhqueh. Auh in inxiuh catca cē calli.

Inin Tōnatiuh nāhui ātl ītōcā; Chālchiuhtlīcuē catca īteōuh. Inihqueh inic nāppa onoccah āpachiuhqueh nāhui ātl in Tōnatiuh catca. Auh in ic poliuhqueh auh in ic manca ātl ōmpōhualxihuitl īpan mahtlāctliomōnxihuitl, āpachiuhqueh, mīmichtin mocuepqueh. Auh in quicuāyah teōcentli in īntōnacayouh catca. Auh in ic nencah cēntzonxihuitl īpan mahtlācpōhualxihuitl īpan yēmpōhualxihuitl īpan caxtōlcēxihuitl. In ic popoliuhqueh zan cemilhuitl huālpachiuh in ilhuicatl, nāhui ātl īpan cemilhuitōnalli poliuhqueh, moch poliuh. Auh in īnxiuh catca cē tōchtli.

Inin Tōnatiuh nāhui ōllin ītōcā, inīn yeh tehhuāntin totōnatiuh in tonnemih āxcān. Auh in ticcuāzqueh centli, etl, huauhtli in tōnacayouh yez. Auh inīn īnēzca in nicān cah in ic ōtlapanhuetz in Tōnatiuh in teōtexcalco in oncān in Teōtīhuacān. Mochīuh Tōnatiuh in Nanāhuātzin, mochīuh Mētztli in Tēucciztēcatl. Inic mācuīlli Tōnatiuh nāhui ōllin in ītōnal mihtoā Ōllintōnatiuh īpampa mōlini in ohtlatoca. Auh in iuh conihtōtihuih in huēhuetqueh īpan mochīhuaz tlālōliniz mayanalōz in ic tipolihuizqueh. Auh in toxiuh motēnēhua cē tōchtli, cē ācatl, cē tecpatl, cē calli. Inic Mācuīlli Tōnatiuh quilmach tlamiz īpan Tlamahtlācōnti 21, 2012 ^{(13 tecpatl)} xihuitl.