Inic Macuilli Tonatiuh

Tlahtollotl

In nican cah zazanilli ye huehcauh mochiuh in ic mamanca tlalli, cecentetl in itlamamanca in ic peuh in zan iuh macho in iquin tzintic in achtopa in omanca Tonatiuh ixquichca chicontzonxihuitl ipan chicuepohualxihuitl ipan onxihuitl axcan ipan ce ilhuitl itech Atl cahualo ipan chicome tochtli xihuitl. Inin Tonatiuh nahui ocelotl itoca; Tezcatlipoca catca īteouh. Inihqueh in iz cepan onoccah ocelocualohqueh ipan nahui ocelotl in Tonatiuh catca. Auh in ic tecuancualohqueh mahtlacxihuitl ipan yexihuitl, in ic tlamito auh ihcuac poliuh in Tonatiuh. Auh in quicuayah acecentli in intonacayouh catca. Auh in ic nencah centzonxihuitl ipan mahtlacpohualxihuitl ipan yepohualxihuitl ipan caxtollioncexihutl. In ic popoliuhqueh zan cemilhuitl in cualohqueh nahui ocelotl ipan cemilhuitonalli in ic poliuhqueh. Auh in inxiuh catca ce acatl.

Inin Tonatiuh nahui ehecatl itoca; Quetzalcohuatl catca iteouh. Inihqueh in inic oppa onoccah ehecatoqueh ipan nahui ehecatl in Tonatiuh catca. Auh in ic poliuhqueh ehecatoqueh, ozomahtin mocuepqueh; in incal in incuauh moch ehecatoc, auh inin Tonatiuh zan no ehecatoc. Auh in quicuayah cencocopi in intonacayouh catca. Auh in ic nencah caxtolpohualxihuitl ipan yepohualxihuitl ipan nahui xihuitl. In ic popoliuhqueh zan cemilhuitl in ehecatoqueh nahui ehecatl ipan cemilhuitonalli in ic poliuhqueh. Auh in inxiuh catca ce tecpatl.

Inin Tonatiuh nahui quiyahuitl itoca; Tlaloc catca iteouh. Inihqueh in inic yeppa onoccah tlequiyahuiloqueh ipan nahui quiyahuitl in Tonatiuh catca. Auh in ic poliuhqueh in tlequiyauh, totolin mocuepqueh. Auh in quicuayah ahuatomatl in intonacayouh catca. Auh in ic nencah caxtolpohualxihuitl ipan mahtlactliomonxihuitl.In ic popoliuhqueh zan cemilhutl in tlequiyahuiloqueh, nahui quiyahuitl ipan cemilhuitonalli in ic poliuhqueh. Auh in inxiuh catca ce calli.

Inin Tonatiuh nahui atl itoca; Chalchiuhtlicue catca iteouh. Inihqueh inic nappa onoccah apachiuhqueh nahui atl in Tonatiuh catca. Auh in ic poliuhqueh auh in ic manca atl ompohualxihuitl ipan mahtlactliomonxihuitl, apachiuhqueh, mimichtin mocuepqueh. Auh in quicuayah teocentli in intonacayouh catca. Auh in ic nencah centzonxihuitl ipan mahtlacpohualxihuitl ipan yepohualxihuitl ipan caxtolcexihuitl. In ic popoliuhqueh zan cemilhuitl hualpachiuh in ilhuicatl, nāhui ātl īpan cemilhuitōnalli poliuhqueh, moch poliuh. Auh in inxiuh catca ce tochtli.

Inin Tonatiuh nahui ollin itoca, inin yeh tehhuantin totonatiuh in tonnemih axcan. Auh in ticcuazqueh centli, etl, huauhtli in tonacayouh yez. Auh inin inezca in nican cah in ic otlapanhuetz in Tonatiuh in teotexcalco in oncan in Teotihuacan. Mochiuh Tonatiuh in Nanahuatzin, mochiuh Metztli in Teucciztecatl. Inic macuilli Tonatiuh nahui ollin in itonal mihtoa Ollintonatiuh ipampa molini in ohtlatoca. Auh in iuh conihtotihuih in huehuetqueh ipan mochihuaz tlaloliniz mayanaloz in ic tipolihuizqueh. Auh in toxiuh motenehua ce tochtli, ce acatl, ce tecpatl, ce calli. Inic Macuilli Tonatiuh quilmach tlamiz ipan 21 diciembre, 2012 ^{(13 tecpatl)} xihuitl.